Newyddion / Datganiadau i'r wasg

25/11/2010

Cadwch yn ddiogel a chlyd gyda Dŵr Cymru Welsh Water

Lapio cyn cracio

Cyn bod y tywydd yn troi’n wirioneddol oer a rhewllyd, y neges oddi wrth Dŵr Cymru Welsh Water yw ‘Cofiwch lapio cyn cracio’.

Mae’r cwmni dŵr yn cynnig cyngor syml i gwsmeriaid i gynorthwyo i osgoi’r anhwylustod a’r gost y gall pibell wedi’i difrodi gan rew ei achosi.

Fe ddywedodd Sally Gronow, pennaeth cyfathrebu Dŵr Cymru Welsh Water: “Fe all pibellau wedi rhwygo achosi gwerth miliynau o bunnau o ddifrod y flwyddyn, a hefyd wastraffu dŵr yn ddiangen. Fodd bynnag, fe all pobl gynorthwyo i atal hyn drwy edrych i weld bod yr holl bibellau ac ati, sestonau a thanciau mewn mannau di-wres wedi’u hinsiwleiddio’n dda ac nad oes yna fwlch yn y deunydd insiwleiddio mewn troadau, ‘tïau’ a falfiau. Nid yw’n angenrheidiol insiwleiddio o dan eich tanc yn y llofft gan y bydd yr aer cynnes o’r ystafelloedd islaw yn cynorthwyo i atal y tanc rhag rhewi.”

Mae Sally hefyd yn cynghori eich bod yn cadw gwres eich cartref ar dymheredd sy’n gyson isel yn ystod tywydd rhewllyd i atal pibellau rhag rhewi. Ac yn ystod cyfnodau hirfaith o rew, fe ddylai pibellau y tu allan ac unrhyw blymwaith agored gael eu hynysu a’u draenio, gan adael y tapiau draenio yn agored, tan y bydd y tywydd yn gwella.

Fe ddylai cwsmeriaid sy’n dymuno cael taflen wybodaeth gyda rhagor o fanylion ynglŷn â sut i osgoi pibellau dŵr wedi rhewi gysylltu â Dŵr Cymru Welsh Water ar 0800 052 0138. Fe allwch hefyd fewngofnodi i wefan Dŵr Cymru Welsh Water yn www.dwrcymru.com i lawrlwytho copi o’r daflen, neu wrando ar recordiad sain o gynnwys y daflen yn lle hynny.

Mae Dŵr Cymru Welsh Water yn buddsoddi’n hael ac yn gweithio’n galed i sicrhau gwasanaethau o’r ansawdd uchaf i’r holl gymunedau maent yn eu gwasanaethu. Mae’r cwmni’n buddsoddi £1.3 biliwn yn ei rwydwaith dŵr a charthffosiaeth rhwng 2010 a 2015.

Mae’n ‘gwmni nid-er-elw’ sydd wedi bod ym mherchnogaeth Glas Cymru ers 2001. Nid oes gan Dŵr Cymru Welsh Water gyfranddalwyr, ac mae unrhyw wargedion ariannol yn cael eu hail-fuddsoddi yn y busnes er budd cwsmeriaid.

Clic yma i weld ein ffilm esboniadwy.

Gellir ddarganfod mwy am blymwyr cofrestredig trwy ddilyn y linciau canlynol Water Industry Approved Plumber Scheme a’r Chartered Institute of Plumbing and Heating Engineering.

Diwedd

Nodiadau i Olygyddion

Mae mannau di-wres yn cynnwys llofftydd, toeau, o dan y lloriau, adeiladau allanol a garejis.
Fe ddylai deunydd insiwleiddio gydymffurfio â safon B.S.5422 ac fe ddylid ei osod yn unol â B.S.5970.
Os ydych i ffwrdd o’ch cartref am unrhyw hyd o amser, caewch y cyflenwad dŵr a draeniwch y system.

Rhewi

Cofiwch, er y bydd difrod i bibellau yn digwydd pan fônt yn rhewi, fe ddaw’r rhwyg ond yn amlwg yn ystod y dadmer. Os oes yna rewi wedi digwydd, fe ddylech ynysu’r man yr effeithiwyd arno drwy gau’r tap cau (bob amser i gyfeiriad clocwedd) ar y cyflenwad hwnnw.
Edrychwch i weld ble mae’ch tap cau i wneud yn sicr y gellir ei agor a’i gau. Os na ellir ei gau, fe ddylech gau’r tap cau allanol ar derfyn eich eiddo. Agorwch dapiau i sinciau, basnys, ac yn y blaen i ddraenio’r system blymio pan fydd y dadmer yn digwydd. Fe ddylai hyn leihau unrhyw ddifrod yn eich cartref, a achosid gan ddŵr yn dianc o bibell wedi rhwygo.

Dadmer

Cyn ichi ddechrau dadmer y system, symudwch bopeth y gellir ei ddifrodi gan ddwr wedi dadmer yn dianc o bibellau wedi rhwygo.

Rhybudd

Wedi i rewi ddigwydd, fe all fod yna berygl o ffrwydrad os caiff y gwres ei gynyddu’n ddisymwth. Peidiwch â throi ymlaen unrhyw offer gwresogi dŵr, boeleri, twymwyr tanddwr (gwresogyddion troch), ac yn y blaen tan ‘rydych yn sicr bod y system wedi dadmer.
Peidiwch â cheisio dadmer pibellau drwy ddefnyddio fflam agored megis chwythlamp. Yn hytrach, defnyddiwch botel dŵr poeth neu sychwr gwallt, ond cymerwch bwyll, efallai bod yna bibell wedi rhwygo a allai chwistrellu dŵr fel mae’n dadmer.

Gofal! Nid yw dwr a thrydan yn cymysgu

Byddwch yn ofalus o’ch gwifrau neu offer trydanol, gan y gallant fod wedi’u heffeithio gan y rhwyg. Os oes gennych unrhyw amheuaeth, diffoddwch eich trydan yn y brif wifren a galwch am drydanwr. Os oes yna unrhyw ddifrod i’ch pibellau dŵr, efallai y byddwch eisiau galw am blymwr.